Антолог ја претстави „Куќата на џамијата“ од Кадер Абдолах

Издавачката куќа Антолог од Скопје со големо задоволство во рамките на проектот Читаме заедно! (United we read!) ви ја претставува книгата КУЌАТА НА ЏАМИЈАТА од холандско-иранскиот автор Кадер Абдолах

Кадер Абдолах (1954) е ирански писател што пишува и на холандски јазик. Неговото вистинско име е Хосеин Саџади Гемагами Фарахани. Тајно ја проучувал западната литература и го осознавал поимот за слободата. Како студент по физика во Техеран, пишувал за еден нелегален весник и тајно објавил две збирки раскази под псевдонимот Кадер Абдолах. На холандската литературна сцена дебитирал во 1993 година. Делата на Абдолах се преведени на повеќе од 20 јазици.

На македонски јазик досега во издание на Антолог се објавени две книги од Абдолах – Бележникот на татко ми и Куќата на џамијата.

 

Семејството на Ага Џан, главниот лик во романот Куќата на џамијата, со векови е едно од најпознатите и најмоќните семејства во градот. Тие живеат во раскошна куќа поврзана со џамијата. Верни на муслиманската традиција, секоја нивна генерација „раѓа” по еден имам, духовен лидер на своето време. Кога умира имамот Алсабери, семејството го избира Галгал. Но неговите проповеди имаат политички конотации. Галгал се приклучува на антиамериканското движење и бега во друг град.

Имамот е важен човек, но важен е и Ага Џан, богат трговец и писател. Тој сфаќа дека големите општествени промени носат тешки времиња. Сѐ повеќе членови на семејството ја напуштаат куќата на џамијата и тргнуваат по различни патишта. Како одговор на слободниот живот, група предводена од Хомеини ја презема власта. Сите оние што не го почитуваат исламот на ист начин како што тоа го прават тие се егзекутирани на самото место.

Ова е роман за богатството на иранската култура, суштината на исламот, уметноста, човековата природа, влијанието на радиото и телевизијата! Една од најпознатите книги напишани на холандски јазик.

Во изданието на Куќата на џамијата на македонски јазик преводот од холандски е дело на Ели Пујовска, а графичкото уредување е на Марко Трпески. Книгата е објавена со поддршка на програмата Креативна Европа на Европската Унија.

Trivia

Кадер Абдолах беше гостин во Македонија на петтото издание на Фестивалот на европската литература „BookStar 2019″ и наиде на одличен прием кај македонската читателска публика.

©EKRAN.MK Вестите на интернет страницата на редакцијата ЕКРАН.мк може да се користат исклучиво за лично информирање. Без писмена дозвола од ЕКРАН или посебен договор, не е дозволено превземање, користење или реемитување на вестите, во спротивно ќе уследи фактурирање на име „плагијат“ во вредност од 20.000 денари.

Видете следно

Излезе нов број од списанието „МАКЕДОНИКА“

Во најновото издание на списанието „Македоника“, двобројот 23-24, што го издава Друштвото за издавачка дејност …